نســــيـــــم العـــــــمر

انت الان فى عالمى الخاص^_^

لما تبقى ماشى فى وسط الشارع
وانت فى نص شهر يوليو
لابس هدومك الملائمة للجو ده
وماشى تتفرج عالمحلات بأعجاب
وتتابع الاطفال بيلعبوا بالكورة حواليك وانت بتفاديهم
وسامع الراجل بينادى على بضاعته وكأنه بيغنى ليها
والرؤية واضحة ليك بالشكل ده
ماشى بحرية ونشاط وكأنك طاير فى الجو
ماشى مبتسم وكأنك عارف الناس كلهم

وفجاة تلاقى نفسك وصلت للمكان اللى انت عايزه
وتدخل بحيوية المكان وتقول بصوت عالى للموجودين
صباح الخير وعلى وشك ابتسامة :)
ده يوم جميل


ولما تبقى ماشى فى وسط الشارع فى نص شهر يوليو
ولابس بردو هدومك الملائمة للجو ده
بس للاسف مش حاسس انها ملائمة خالص دى تقيلة جدا
والجو حر ومقرف والمناديل مش مكفيه
ماشى راسك فى الارض
والجو اصفر والشوارع مليانة تراب
والاطفال بتلعب بطريقة مستفزة فى كل مكان حواليك
لدرجة انك مش ملاحق تفاديهم ونفسك تضربهم
والبياع عمال يزعق فى اللى واقف بيشترى منه
وينادى عالبضاعة كأنه عايز يخلص منها
الشوارع زحمة والعربيات بتخبط فيك
الطريق مش راضى يخلص
والجو حر ووشك مش مستحمل
هيلاقيها من الجو ولا من تكشيرة وشك اللى وجعته
واخيرا توصل للمكان
تدخل وانت منهك وبتتاخد نفسك بصعوبه
تقول بصوت يكاد يكون مش مسموع ازيكم
!!
مع ابتسامة واقفة لمدة ثوانى :|

ده يوم مش جميل

للاسف
يوم جميل =يوم مش جميل
هما الاتنين واحد نفس اليوم فى نفس الشهر
نفس الجو ونفس الحر نفس الهدوم
نفس الاطفال وحتى البياع هو هو
بس الفكرة ان الموضوع موضوع نسبية

الحالة الاولانية جواك مبسوط فحسيت ان كل الناس مبسوطين
الحالة التانية اللى جواك مخنوق فحست ان كل اللى حواليك بيخنقوك اكتر

حياتنا كلها كده
وده كان الدرس المستفاد من اول اسبوع فى الشغل
بعد اكتر من 3 شهور تدريب فى نفس الصيدلية
وبمشى نفس الطريق
فى نفس الوقت
بس الحالة مش هى هى


2 comments:

اخدتيني مني يا مها بالبوست الحلو قووووووووووووي ده..
متهيالي على حسب ما فهمت لو مش حابة تشتغلي صيدلانية فا انت ممكن تكوني حاجة من اتنين..
فيلسوفة..
او اديبة..
وفي الحالتين ها اشتري كتبك :)
صباحك مشرق زي اليوم اللي بيبقى جميل
:)

مجاملة لتانى مرة فى يوم واحد
ماشى مقبولة
:)
وبصراحة انا لسى مش عارفة انا عايزة اشتغل ايه فلا

searching for :

About Me

My photo
alex, Egypt
this is my own world to which i escape.. here u will find me.. my own thoughts & imaginations

Followers

Total Pageviews

هذا ربى

هذا ربى

هذا قرأنى

هذا قرأنى

هذا رسولى

هذا رسولى

دفعة التحرير ..دفعتى

دفعة التحرير ..دفعتى

ودى ان شاء الله ..سنة تخرجى

ودى ان شاء الله ..سنة تخرجى

يارب

آللّهمْ آزْرَعْنْي فْيّ قْلوبْ آلنْآسّ كَآلنْبّتْة آلصَالِحَة
آللّهمْ أجْعَلنِيْ للنْاس قْدْوَة
ولا تْجْعَلنْيِ للنْآسّ عْبْـرَةْ