نســــيـــــم العـــــــمر

انت الان فى عالمى الخاص^_^


مابين ال "ما قبل" وال "ما بعد" فترة اصعب من قوة احتمالك




مابتكسفش لما بقول على نفسى قليلة الحيلة
ومابزعلش لما بكتشف انى ساذجة اكتر مما توقعت
وبفرح اوى لما بكتشف ان اللى حسيته طلع صح
عارفة انى تقليدية لحد الملل
ومتقلبة لحد التمرد
وعفوية لحد التسرع
ومترددة لدرجة الكسل
رغم ان حياتى مليانة بالروتين

إلا انى مقتنعة ان ده مفيد ليا عشان سهل احس بالتغيير
بشوف الدنيا زى ماهى مش كلها الوان


والابيض مش حلو اوى
والاسود دايما فيه باب نور


انا اللى بقفله بأيدى ...احيانا بغبائى ودايما بأختيارى

.


.


.


عشان بحب الضلمة

يوم حفلة تخرجى


الساعة 11 صباحا


كنت افكر جديا فى معرفة ذلك الشىء الذى سوف ينقض فرحتى او ينقصها
تمنيت قبلا امنية كنت اود ان تتحقق فى هذا اليوم
ولأن بوادرها لم تسبقها فعلمت انها لن تحدث
ولذا عدلت عن انتظار اى شىء جديد...فما كنت انتظره ان ينقص فرحتى موجود فعليا




الساعة 8 مساء


كنت فى حيرة من أمرى هل على أن اندم على امنيتى ام افرح

حتى اننى لم اشعر بتلك السعادة المنقوصة التى ارتضيتها فى اول يومى هذا
أدركت حينها ان بعض امانينا قد تجلب لنا تعاسة اكثر من تلك السعادة المرجوة منها
و وددت لو اننى لا اتمنى شيئا اخر
فلتجلب لى الدنيا ما تشاء




اشتاق للحظة تضم يدى فيها ولا اخاف من لوم

لكلمة تذيعها على مسامعهم بلا ريبة او شك

لنظرة لا تخطفها من وسط اعينهم كسارق اللذات



اشتاق ان اكتب لك

كل ما يخالجنى من فكر او شعور تجاهك حتى فى غيابك

ان اقص عليك احداث يومى الصغيرة التى لطالما اهتممت بها اكثر منى

اشتاق ان ارسم لك

بيتنا الصغير الذى حلمت به دوما معك

غرفتنا وانا احتفظ بداخلها بمتحف من صورك وملابسك

وبكل الزهور التى اهديتنى اياها

تلك المجففة ومازالت تحتفظ بعطرها كما كانت

غرفة اطفالنا بألوانها البهية والحياة تموج فيها

اشتاق لاسميهم اسماء تتناغم مع اسمك
ان اربيهم كما تريد
لاجعلهم نسخة اخرى منك علها تشبع طمعى بك



..اشتاق لان احكى لك كيف كنت ومازلت اشتاق اليك


(8)

أفضل ما علمتنى اياه
هو أن اكون مثلك


ابحر عكس الريح


واتمنى المرسى سريعا
ولا افقد الامل ابدا


رغم ثورة اليأس بداخلى




يتبع


هكذا نحن


نخاف الفشل عندما نشتهى النجاح


ونؤمن بقناعاتنا اذا حان وقت الاختيار


ونلحد بكل شىء عدا الحظ السىء


اذا فشلنا


(5)

معرفتى بيك جبرتنى احطك فى خانة لوحدك
لا قريب ولا بعيد
لا صديق ولا غريب
عشان كده كان فى كلام كتير كان من حقك تعرفه
لا كان ينفع ساعتها تعرفه ولا بقى ينفع دلوقتى



اسفة انى خلفت توقعاتك ..لكن كان الافضل لينا
بس لازم تعرف انك اثرت فى حياتى رغم عدم وجودك فيها


...

(6)
ممكن طلب
بلاش تستغربينى لما اطلب حقى
ماتزعقليش لما اشتكيلك
وماتسيبينيش فى نص البحر وتقوليلى اختارى
لما بطلبك جنبى صدقينى مش بيكون عندى اختيار تانى
صدقينى

....


(7)
لما خبيت عليكى ...خبيت لانى حسيت انك مش مهتمة
لما خبيتى عليا ...خبيتى لانك حسيتى انى مهتمة
مهتمة بيكى لدرجة انى خايفة عليكى من تفكيرك

ده مش عذر
احنا بعدنا اوى فى الوقت اللى كنت فاكرة فيه انك اقرب حد ليا




يتبع..

(1)


نفسى مرة تفكر فى غيرك...او حتى تفكر فى نفسك بس بالخير
نفسى فى يوم تقتنع انك ممكن تغلط وانك مش الوحيد اللى عبقرى
نفسى لما تفهمها وهى طايرة تفهمها صح
نفسى تسمع للى قدامك وتفهم هو عايز يقولك ايه
وعشان عارفة انك لا هاتسمع ولا هاتفهم
مش هاقولك نفسى فى ايه

....

(2)



الحل مش ان المشكلة تبعد عنك .. عمرها ماهاتتحل كده وتنساك
الحل انك تبصلها من ناحية تانية بس للاسف فى حاجات شاغلاك
عامة انا عارفة ان مافيش امل ومش هاتعب نفسى معاك
سكوتك علمنى اتكلم وهاتحرك مش هاقف واستناك
.....

(3)

مشكلتنا اننا فاهمين بعض اوى لدرجة اننا مابنحاولش نفهم بعض كمان
المشكلة انى لما بطلب اقرب منك مش بلاقيلى مكان
ولما بتطلبى تقربى منى بيكون فات الاوان

..........
(4)

عذاب الضمير ...احساس يمكن ماحسيتهوش فى حياتك
عشان كده ماعذرتنيش لما ترددت كتير قبل ما اقول قرارى
قرارى اللى دلوقتى انا متأكدة انه اصح واعقل قرار انا اخدته فى حياتى
نسيت تفاصيلك ومش فاكرة منهم غير غرور وكبرياء مزيف
واستهتار مخبيه ورا ستارة تفاؤلك
صفات لا تمكننى من الحديث عنك او اليك
.....
يتبع





ماصدقت لقيته تانى
والصدفة جمعت مابينهم
حكيتله على كل اللى فاته من حكايتها

سرح وهو معاها
ناديته بلهفة

فرد وقال ...ايوة يا سلمى معلش -
انا اسمى علياء على فكرة :( -
انا عايزة اروح

ياريته ماكان قابلها



بمقولة مشهورة بينهى كل واحد مننا قصة حبه مع حاجة عزيزة عليه
ضاعت منه قريب

ماحدش بيحس بقيمة الحاجة اللى فى ايده الا لما تضيع منه

لو عكسنا الوضع من الاول وحبيت تعرف قيمة اللى فى ايدك
احرم نفسك منه
او اتخيل انه حرمك منه
ساعتها بس هاتحس بقيمته !

وحتى لما تحب تعرف قيمتك عن حد عزيز عليك
احرمه منك شوية
يا اما هيدور عليك بعديها :)
يا اما هايحمد ربنا على طول :S
طريقة فعالة الا فى العلاقات الجديدة
^_^



الغياب بيقتل قصص الحب الصغيرة وبيقوى قصص الحب الكبيرة
زى الريح لما بتتطفى شمعه على الطربيزة
وتزود حريقة فى الغابة
عمر طاهر ....جر ناعم


بعشق نسمة الهوا الساقعة ساعة اذان الفجر


لان الابتسامة مش دليل على اللى جواك
فمافيش مانع لو كنت متضايق وابتسمت

ولان الابتسامة بتشجع اللى قدامك انه يخليك تضحك
فمافيش مانع بردو لو سمحتله يضحكك شوية من نفسك

ولان الابتسامة ممكن تفرض نفسها عليك كعادة
فمافيش مانع تبتسم وتتعود

ولأن الابتسامة فى وجه اخيك صدقة
فمافيش مانع تبتسم و تاخد ثواب

ولان الابتسامة هى اللى مصبرانى على شغلى
فببتسم وامرى الى الله
:)

ملحوظة : عشان خاطر اسراء :)


فى اعلانات تخليك تحب المنتج حتى لو ماجربتهوش
(زى اعلانات دايم )
وفى اعلانات تكرهك فى المنتج واللى بيشتروه

(زى بيريل )
زى الناس بالظبط فى ناس بتعبر عن نفسها بطريقة غلط فتكرههم رغم انك عارفهم
وفى ناس بتعرف تعمل شو لنفسها كويس لدرجة انك تنخدع فيها
عامة دايما الاعلان مش بيبقى دليل على جودة المنتج
!

لما توصل لدرجة انك تحس ان كل مشاكل اللى حواليك هاتتحل بموتك
والكل بيرمى عليك الحمل
رغم انك مقتنع ان المشكلة مش انت
دى قلة حيلة منك
وانانية و تعجرف من خصمك
وضعف من اللى المفروض يكونوا حمايتك
يبقى الحل ايه؟؟
حد يقتلنى وانا مسامحاه
ربنا يخدنى لو ده الخير للكل
يارب ارحمنى

ساعات وانا واقفة فى الصيدلية استغرب نفسى ...انا بجد مش طايقة المكان ومع ذلك ببتسم لما حد بيكلمنى وبحاول اعمل اللى المفروض يتعمل

وارجع اقول يعنى هى اول ولا اخر مرة هاعمل حاجة انا مش طايقة اعملها ...ما حياتى كلها كده
دى مش كأبة دى واقعية !!



اللهم انا نحمدك حمدا كثيرا طيبا مباركا فيه

اللهم لك الحمد دائما وابدا

نتيجة السنة دى احلى نتيجة شافتها عنيا فعلا
واكيد طبعا عشان نتيجة التخرج

خلاص انا كده اتخرجت من الكلية اللى مابحبهاش
ربنا يقدرنى ويقدرلى اشتغل شغالانه بحبها
:)

السنة دى رغم ان حالتى النفسية مش اد كده
بس فرحانة برمضان اكتر من اى سنة
وحاسة انه هايبقى احلى ان شاء الله

يارب احساسى يكون صح
وربنا يتقبل منى الصيام وصالح الاعمال ويغفرلى ويتوب عليا
امين يارب
وكل سنة وانا طيبة بقى :)

الكتمان ...رغم قساوته
إلا انه ليس اقسى من الندم على البوح !

جملة عجبتنى

لما تبقى ماشى فى وسط الشارع
وانت فى نص شهر يوليو
لابس هدومك الملائمة للجو ده
وماشى تتفرج عالمحلات بأعجاب
وتتابع الاطفال بيلعبوا بالكورة حواليك وانت بتفاديهم
وسامع الراجل بينادى على بضاعته وكأنه بيغنى ليها
والرؤية واضحة ليك بالشكل ده
ماشى بحرية ونشاط وكأنك طاير فى الجو
ماشى مبتسم وكأنك عارف الناس كلهم

وفجاة تلاقى نفسك وصلت للمكان اللى انت عايزه
وتدخل بحيوية المكان وتقول بصوت عالى للموجودين
صباح الخير وعلى وشك ابتسامة :)
ده يوم جميل


ولما تبقى ماشى فى وسط الشارع فى نص شهر يوليو
ولابس بردو هدومك الملائمة للجو ده
بس للاسف مش حاسس انها ملائمة خالص دى تقيلة جدا
والجو حر ومقرف والمناديل مش مكفيه
ماشى راسك فى الارض
والجو اصفر والشوارع مليانة تراب
والاطفال بتلعب بطريقة مستفزة فى كل مكان حواليك
لدرجة انك مش ملاحق تفاديهم ونفسك تضربهم
والبياع عمال يزعق فى اللى واقف بيشترى منه
وينادى عالبضاعة كأنه عايز يخلص منها
الشوارع زحمة والعربيات بتخبط فيك
الطريق مش راضى يخلص
والجو حر ووشك مش مستحمل
هيلاقيها من الجو ولا من تكشيرة وشك اللى وجعته
واخيرا توصل للمكان
تدخل وانت منهك وبتتاخد نفسك بصعوبه
تقول بصوت يكاد يكون مش مسموع ازيكم
!!
مع ابتسامة واقفة لمدة ثوانى :|

ده يوم مش جميل

للاسف
يوم جميل =يوم مش جميل
هما الاتنين واحد نفس اليوم فى نفس الشهر
نفس الجو ونفس الحر نفس الهدوم
نفس الاطفال وحتى البياع هو هو
بس الفكرة ان الموضوع موضوع نسبية

الحالة الاولانية جواك مبسوط فحسيت ان كل الناس مبسوطين
الحالة التانية اللى جواك مخنوق فحست ان كل اللى حواليك بيخنقوك اكتر

حياتنا كلها كده
وده كان الدرس المستفاد من اول اسبوع فى الشغل
بعد اكتر من 3 شهور تدريب فى نفس الصيدلية
وبمشى نفس الطريق
فى نفس الوقت
بس الحالة مش هى هى


الشوارع كلها دوشة وزحمة

والناس ماشية تزعق بصوت عالى

كلهم بيخبطوا ويرزعوا ويزعقوا فى بعض

الشوراع مليانة مبانى
وعربيات
واطفال بتلعب بعنف فى كل مكان


مابصدق اروح بيتنا

حتى بيتنا بقى دوشة !

واوضتى مليانة اصوات غربية

المروحة حركتها بتنرفزنى

والساعة دقاتها مزعجة

شوية هدوء ارجوكم






افضل أن اعيش فى ملــل الهدوء



على



ان احيـا فى إثـــارة المشاكل




!!بئسا لموت نعشق الهروب إليه من جحيم حياتنا



Unfortunately,

till now
i didn't find him /her who can cope with me along the way
sorry my friends !!



after deep thinking i discovered
am schizophrenic !!

ملانة
لأ زعلانة
لأ لأ مخنوقة شوية

لأ انا متضايقة
لأ انا مش متضايقة اصلا هتضايق ليه؟

لأ انا فعلا متضايقة

انا محيرة نفسى ليه؟
مش مستاهلة الحيرة دى كلها

خلاص انتهينا
بس كنت سخيفة
كان لازم افهم من الاول
:@




ياريــــــــت
مايبقى بعمرى كلمة ياريـــــــت



اللهم انا نستودعك احلامنا
ونسألك ان تحقق مافيها من خير لنا
وابعد عنا كل سوءاتها وشرورها يارب
يارب

ولأن أسوأ احلامنا ...تفسرها مخاوفنا

بيجيلى كوابيس كتير الأيام دى


البحر وحشنى اوى
:(




مش عارفة ليه الأيام دى بقلب فى دفاترى القديمة
رسايلى وايميلاتى وكتاباتى القديمة
وكل ذكرياتى اللى كنت اساسا نسيتها من زمان
يمكن عشان خايفة من اللى جاى

انا فعلا خايفة
بس ربنا كريم !

بقالى فترة حاسة انى هاموت قريب

ربى امتنا موتة ترضيك
واجعل اخر كلامنا اشهد ان لا اله الا الله وان محمد رسول الله



the beauty of our life in it's simplicity






بعض علاقاتنا كموج البحر ..



تأتى لتمدنا بانتعاشها الخاص ..ثم تنحصر مرة أخرى لتأخذ معها ما أعطتنا اياه وما كنا نملك ايضا
:(



بعد أن اشتد الخلاف بينهما
نظر إليها نظرة صامتة ...وقال لها بصرامة
"أنتِ ملكى الآن آتِ إليكِ حينما احتاج وأذهب عنكِ عندما أريد..فلا تُملى على ما أفعل "
انصرف عنها ...وحمل مفاتيحه وهاتفه المحمول ..وطاح بالباب خلفه...قبل ان ينزل مسرعا على درج المنزل

جلست هى فى هدوء ..ماعادت قدماها تتحملان مساندتها..
علقت نظراتها على الباب وهى تتذكر كل ما كان بينهما أيام الخطبة

هو..سهر ليلته مع اصدقائه ...وفى الفجر قرر العودة الى منزله
ما إن دخل من باب المنزل حتى وجدها تنتظره ..على نفس الأريكة..وبنفس النظرة _كما تركها_ قابلته

لم يعطها اهتمام..دخل الى غرفة نومه ...بدل ثيابه..وغاط فى نوم عميق
وفى الصباح فاق..لم يجدها بجانبه كعادته كل يوم..
خرج متوقعا انها مازالت فى تلك الصالة التى شهدت اول لمسة يد فى ليلة العرس

كان مكانها فارغا إلا من دفتر مذكراته قبل الزواج...كان أول هدية لها بعد ان صارحها بحبه
فتح أول صفحة "المقدمة" وبدأ يقرأ

مقدمة
"هذه هى مذكراتى فى سنوات حبك.. بعد ان فاض بى ولم استطع حتى الان ان اعبر لكى عن كل ما يخالجنى من شعور تجاهك...فقررت أن أبوح لأوراقى بما بى من حب وشوق
قد يأتى يوم و تقرأين فيه كلامى هذا ...
ويومها سأكون اسعد من على وجه الارض كلها
اتمنى لو تعلمى يوما ما ..ما احفظه بداخلى لكى
احبك يا توأم روحى... احبك"

وبخط أنثوى ضعيف..وجد عبارة جديدة..لم تكن إلا وليدة ساعات
بحروف دامعة كُتِبت...
"نعم ان لم تكن تعلم انك من يومها اسعد كائن على وجه الارض...فانا اعلم انى اصبحت اتعس أمرأة فى عالم الأحياء "
"شكرا..فأنا لم اعد ملكك بعد الان..انا ملك خالقى ..وإليه رحلت....
الوداع
..يا سجان روحى ...الوداع








تمت..!




30/04/2011

ياااااااااااااااااااه كنتى واحشانى اوى يا بلوجتى
:))

اخيرا النت رجع

جايالك ومحضرالك مفاجأة جديدة

جيبالك حرف الذال معاياااا :))





يستنكرون منى ألا اعاتبهم على ما فعلوه بحقى

فإن عاتبتهم

اصلحوا او لم يصلحوا ما بدر منهم



! ...فكله عندى سواء

...







فى حاجات لو طلبناها ...لما بتحصل مابيبقاش ليها طعم
وممكن نرفضها كمان

العد التنازلى ابتدا

استعنا عالشقا بالله :)






لا اكره فى حياتى اكثر من

شخص يحاول ان يتحكم بى

شخص يسىء الظن بى

شخص يكثر من الالحاح

وشخص يستغبانى





وردة دبلانة

وبلورة مكسورة

وهدية مخفيه
وسط ورق مزكرات قديم ..اتمسح منه الكلام



وصورة اتجمعوا فيها من زمان

زى حكاية منتهية قبل الاوان
...




مش عارفة بصراحة ...هل الشخصية دى ليها مسمى فى عالم الكرتون او الرسوم المتحركة؟؟
او ايا كان يعنى
بس بصراحة انا بعلن عن اعجابى الشديد به
وماعنديش مانع لو اطلقت عليه اسم
My Ch!lD fr!eND
i l!ke you : )




:عندما يجدونه حزينا...يواسونه قائـلين ...
ان الحزن دائـما ما يبدأ كبيرا وينتهى صغيرا

ربما لا يدركون أن الحب والحزن كما يرتبطان احيانا
فهم يتشابهان دائما
فكلاهما يبدأ عظيما ليصبح صغيرا...وقد يتلاشى فى النهاية
..!

كل ما امشى فى سكة واحس انى بدأت اتحسن وكأنى خلاص لقيت نفسى
الاقى السكة اتقفلت فى وشى
يا اما اتوه فى نص الطريق

وكأن ربنا بيعاقبنى على حاجة ما اعرفهاش
يارب دلنى وارشدنى
وعرفنى ايه الغلط اللى مالى حياتى ... ومانع رضاك عنى

وساعدنى ابعده عنى



أول مرة يتصادف أن المشروع اللى راكباه


..



وهو معدى من تحت الكوبرى
يمر فى نفس الوقت القطر من فوق الكوبرى




حسيت احساس حلو اوى وانا ببص من شباك المشروع على القطر من تحت ... مش من فوق
وكأنى كنت بستكشف مكان جديد او عملت حاجة مميزة




كنت فى قمة سعادة الطفلة اللى أول مرة تركب لعبة فى الملاهى

يا ترى دى طفولة متأخرة ولا ده من مبدأ الممنوع مرغوب !


اولا احب اوجه كلمة لحرف الزال ...اللى هو اخو حرف الدال
لانى مفتقداه جداا فى الكيبورد
اقوله وحشتنى جداا مش عارف اعملك ايه عشان ارجعك
بحاول اغير الويندوز عشان ترجع....
وبصراحة لأنى عرفت اهميتك... وانا من غيرك مش عارفة انشر اخر قصة قصيرة كتبتها
وده لان فيها كمية لا بأس بها من حرف الزال ...اللى هى اخو حرف الدال وبنقطة من فوق
وهاينقطنى قريب
:)




حين تقف عاجزا عن ايجاد لفظ ما ..يشرح لك شيئا لا تفهمه
حين تعجز عن التعبير عن دفء الجو أو تلون الشفق فإنك تقتل الحياة فى هذا الدفء وفى ألوان السماء
وحين تعجز عن التعبير لنفسك عما يدور بخاطرك فإنك تعلن توقفك عن الحياة




محمد العدوى ...رواية اشراق




حتما انا كنت متوقفة عن الحياة لأكثر من سنة ..



يتخللها بعض اللحظات الحية التى أدون فيها مذكراتى بدون أى تفسير او احساس
ولكنى أشعر الان أن الحياة بدأت تتسلل لى عبر نافذة هذه المدونة

: ) اذا ميلاد سعيد








تلك الغلطة التى لن تسامحنى نفسى عليها ابدا

اننى انزويت بها داخل احد اركانى الوهمية

ظنا منى اننى هكذا احميها
لكنى كنت اواريها التراب بيدى

حتى اننى اصبحت افتش عنها فى كل الاروقة المجاورة
لعلى ادرى اين وأدتها يوما

!.






نفسى يرجع بيا الزمن خمس سنين ورا

هو ده الاحساس اللى مسيطر عليا دلوقتى

searching for :

About Me

My photo
alex, Egypt
this is my own world to which i escape.. here u will find me.. my own thoughts & imaginations

Followers

Total Pageviews

هذا ربى

هذا ربى

هذا قرأنى

هذا قرأنى

هذا رسولى

هذا رسولى

دفعة التحرير ..دفعتى

دفعة التحرير ..دفعتى

ودى ان شاء الله ..سنة تخرجى

ودى ان شاء الله ..سنة تخرجى

يارب

آللّهمْ آزْرَعْنْي فْيّ قْلوبْ آلنْآسّ كَآلنْبّتْة آلصَالِحَة
آللّهمْ أجْعَلنِيْ للنْاس قْدْوَة
ولا تْجْعَلنْيِ للنْآسّ عْبْـرَةْ