نســــيـــــم العـــــــمر

انت الان فى عالمى الخاص^_^

 مع كل يوم بينقضي 

بحس أن في حاجة تايهة مني

حاجة مالحقتهاش  

يوم ببتديه ومستنياه ينتهي وف نهايته بندم اني ماستغلتهوش

دايرة بلف فيها من غير هدف ولا غاية 

احساس بالخوف من الفقد 

افقد فرصة طريق عمر حبيب

.. خوف

هو الخوف 

انا خايفة ...

بلوجتي العزيزة...

بعد الأسف والخجل ...وحشتيني 

انا مترددة اكتب ايه ...صوابعي بتترعش كأني بكتب جواب لحبيبة قديمة ...صديقة فرقنا الزمن ..عبادة فرقتنا الذنوب 

مانكرش ان الورق اسهل واسرع للوصول ...سهل اقطعه احرقه ارميه 

مش هيسجلي لحظة ضعف ولا وجع ولا دمعة 

بس ماقدرش يغنيني عنك ...

انتي ذكرى لفترة كنت فيها انسانة تانية او بالأصح أولي ..أولى عايزة ارجعلها  عايزة اكونها من جديد

مين فينا مابيشتاقتش للانسان اللي كانه من زمان ...بس ماحدش بيرجع زي زمان

مهما غير فيا الزمن ...انتي ماتغيرتيش ...ثابتة ...جماد بس فيكي روح 

فيكي جزء من روحي ...

فيكي أنا ..انا القديمة ,,انا البريئة ..انا الساذجة ..انا الوحيدة...انا اتغيرت 

مش للأحسن ولا للأوحش

بس اتغيرت ..طبع الزمن 


ما خطيتش عتبتك من زمان ..بس كنت بشوفك من بعيد


بحاول صدقيني اكتبلك ...بس ماعنديش ..ماعنديش حاجة تنفع للنشر 


اول مرة اكتب لجماد حي 

انتي ....بلوجتي 

عود كبريت ....ولع
وانطفى
حياتنا ...وكل حياتنا

من يوم ماعرفتك وانا ببكى
كأنى بكفر عن ذنب عملته ومش فاكراه

تصدق
انا يوم ميلادى بكيت
يوم ما وعيت عالدنيا ....لقيتك

 ولدت كى ابكيك وابكى منك

اعمى البصيرة من قال :

نصف العمى ولا العمى كله

نص العمى ..نص حياة ...نص فرحة ...نص نجاح ..نص امل .. نص حقيقة

انصاف لا تغنى ولا تشبع من جوع

انصاف لأبشع قتلـــة

نص الفرحة ...حزن

نص النجاح ...فشل

نص الامل ...يأس

نص الحقيقة... جهل

نص الحياة ..موت

نص العمى ..هو العمى كله 


مابين ال "ما قبل" وال "ما بعد" فترة اصعب من قوة احتمالك




مابتكسفش لما بقول على نفسى قليلة الحيلة
ومابزعلش لما بكتشف انى ساذجة اكتر مما توقعت
وبفرح اوى لما بكتشف ان اللى حسيته طلع صح
عارفة انى تقليدية لحد الملل
ومتقلبة لحد التمرد
وعفوية لحد التسرع
ومترددة لدرجة الكسل
رغم ان حياتى مليانة بالروتين

إلا انى مقتنعة ان ده مفيد ليا عشان سهل احس بالتغيير
بشوف الدنيا زى ماهى مش كلها الوان


والابيض مش حلو اوى
والاسود دايما فيه باب نور


انا اللى بقفله بأيدى ...احيانا بغبائى ودايما بأختيارى

.


.


.


عشان بحب الضلمة

يوم حفلة تخرجى


الساعة 11 صباحا


كنت افكر جديا فى معرفة ذلك الشىء الذى سوف ينقض فرحتى او ينقصها
تمنيت قبلا امنية كنت اود ان تتحقق فى هذا اليوم
ولأن بوادرها لم تسبقها فعلمت انها لن تحدث
ولذا عدلت عن انتظار اى شىء جديد...فما كنت انتظره ان ينقص فرحتى موجود فعليا




الساعة 8 مساء


كنت فى حيرة من أمرى هل على أن اندم على امنيتى ام افرح

حتى اننى لم اشعر بتلك السعادة المنقوصة التى ارتضيتها فى اول يومى هذا
أدركت حينها ان بعض امانينا قد تجلب لنا تعاسة اكثر من تلك السعادة المرجوة منها
و وددت لو اننى لا اتمنى شيئا اخر
فلتجلب لى الدنيا ما تشاء




اشتاق للحظة تضم يدى فيها ولا اخاف من لوم

لكلمة تذيعها على مسامعهم بلا ريبة او شك

لنظرة لا تخطفها من وسط اعينهم كسارق اللذات



اشتاق ان اكتب لك

كل ما يخالجنى من فكر او شعور تجاهك حتى فى غيابك

ان اقص عليك احداث يومى الصغيرة التى لطالما اهتممت بها اكثر منى

اشتاق ان ارسم لك

بيتنا الصغير الذى حلمت به دوما معك

غرفتنا وانا احتفظ بداخلها بمتحف من صورك وملابسك

وبكل الزهور التى اهديتنى اياها

تلك المجففة ومازالت تحتفظ بعطرها كما كانت

غرفة اطفالنا بألوانها البهية والحياة تموج فيها

اشتاق لاسميهم اسماء تتناغم مع اسمك
ان اربيهم كما تريد
لاجعلهم نسخة اخرى منك علها تشبع طمعى بك



..اشتاق لان احكى لك كيف كنت ومازلت اشتاق اليك


(8)

أفضل ما علمتنى اياه
هو أن اكون مثلك


ابحر عكس الريح


واتمنى المرسى سريعا
ولا افقد الامل ابدا


رغم ثورة اليأس بداخلى




يتبع


هكذا نحن


نخاف الفشل عندما نشتهى النجاح


ونؤمن بقناعاتنا اذا حان وقت الاختيار


ونلحد بكل شىء عدا الحظ السىء


اذا فشلنا


(5)

معرفتى بيك جبرتنى احطك فى خانة لوحدك
لا قريب ولا بعيد
لا صديق ولا غريب
عشان كده كان فى كلام كتير كان من حقك تعرفه
لا كان ينفع ساعتها تعرفه ولا بقى ينفع دلوقتى



اسفة انى خلفت توقعاتك ..لكن كان الافضل لينا
بس لازم تعرف انك اثرت فى حياتى رغم عدم وجودك فيها


...

(6)
ممكن طلب
بلاش تستغربينى لما اطلب حقى
ماتزعقليش لما اشتكيلك
وماتسيبينيش فى نص البحر وتقوليلى اختارى
لما بطلبك جنبى صدقينى مش بيكون عندى اختيار تانى
صدقينى

....


(7)
لما خبيت عليكى ...خبيت لانى حسيت انك مش مهتمة
لما خبيتى عليا ...خبيتى لانك حسيتى انى مهتمة
مهتمة بيكى لدرجة انى خايفة عليكى من تفكيرك

ده مش عذر
احنا بعدنا اوى فى الوقت اللى كنت فاكرة فيه انك اقرب حد ليا




يتبع..

(1)


نفسى مرة تفكر فى غيرك...او حتى تفكر فى نفسك بس بالخير
نفسى فى يوم تقتنع انك ممكن تغلط وانك مش الوحيد اللى عبقرى
نفسى لما تفهمها وهى طايرة تفهمها صح
نفسى تسمع للى قدامك وتفهم هو عايز يقولك ايه
وعشان عارفة انك لا هاتسمع ولا هاتفهم
مش هاقولك نفسى فى ايه

....

(2)



الحل مش ان المشكلة تبعد عنك .. عمرها ماهاتتحل كده وتنساك
الحل انك تبصلها من ناحية تانية بس للاسف فى حاجات شاغلاك
عامة انا عارفة ان مافيش امل ومش هاتعب نفسى معاك
سكوتك علمنى اتكلم وهاتحرك مش هاقف واستناك
.....

(3)

مشكلتنا اننا فاهمين بعض اوى لدرجة اننا مابنحاولش نفهم بعض كمان
المشكلة انى لما بطلب اقرب منك مش بلاقيلى مكان
ولما بتطلبى تقربى منى بيكون فات الاوان

..........
(4)

عذاب الضمير ...احساس يمكن ماحسيتهوش فى حياتك
عشان كده ماعذرتنيش لما ترددت كتير قبل ما اقول قرارى
قرارى اللى دلوقتى انا متأكدة انه اصح واعقل قرار انا اخدته فى حياتى
نسيت تفاصيلك ومش فاكرة منهم غير غرور وكبرياء مزيف
واستهتار مخبيه ورا ستارة تفاؤلك
صفات لا تمكننى من الحديث عنك او اليك
.....
يتبع





ماصدقت لقيته تانى
والصدفة جمعت مابينهم
حكيتله على كل اللى فاته من حكايتها

سرح وهو معاها
ناديته بلهفة

فرد وقال ...ايوة يا سلمى معلش -
انا اسمى علياء على فكرة :( -
انا عايزة اروح

ياريته ماكان قابلها



بمقولة مشهورة بينهى كل واحد مننا قصة حبه مع حاجة عزيزة عليه
ضاعت منه قريب

ماحدش بيحس بقيمة الحاجة اللى فى ايده الا لما تضيع منه

لو عكسنا الوضع من الاول وحبيت تعرف قيمة اللى فى ايدك
احرم نفسك منه
او اتخيل انه حرمك منه
ساعتها بس هاتحس بقيمته !

وحتى لما تحب تعرف قيمتك عن حد عزيز عليك
احرمه منك شوية
يا اما هيدور عليك بعديها :)
يا اما هايحمد ربنا على طول :S
طريقة فعالة الا فى العلاقات الجديدة
^_^



الغياب بيقتل قصص الحب الصغيرة وبيقوى قصص الحب الكبيرة
زى الريح لما بتتطفى شمعه على الطربيزة
وتزود حريقة فى الغابة
عمر طاهر ....جر ناعم

searching for :

About Me

My photo
alex, Egypt
this is my own world to which i escape.. here u will find me.. my own thoughts & imaginations

Followers

Total Pageviews

هذا ربى

هذا ربى

هذا قرأنى

هذا قرأنى

هذا رسولى

هذا رسولى

دفعة التحرير ..دفعتى

دفعة التحرير ..دفعتى

ودى ان شاء الله ..سنة تخرجى

ودى ان شاء الله ..سنة تخرجى

يارب

آللّهمْ آزْرَعْنْي فْيّ قْلوبْ آلنْآسّ كَآلنْبّتْة آلصَالِحَة
آللّهمْ أجْعَلنِيْ للنْاس قْدْوَة
ولا تْجْعَلنْيِ للنْآسّ عْبْـرَةْ